2021年1月5日
贏在起跑線之胎教音樂？定音樂胎教？
作為一個音樂教育者兼心理學嘅畢業生，胎教音樂呢個課題又點會無研究過？
心理學好玩之處係在於了解人，唔係睇穿人地諗咩，而係透過一個人嘅背景、佢所經歷過嘅，可以了解嗰個人更多。既然先天嘅基因改變唔到，唔少人就希望透過後天嘅培養同努力，讓自己（或自己嘅下一代）成為更好嘅人，以致近十年出現「贏在起跑線」嘅風氣。
最早條線當然係由發現懷孕開始。人人都話音樂好，但人人都識音樂咩？結果巿場上有一堆胎教音樂嘅產品。當年懷孕時，我梗係好想用自己個小朋友嚟做下實驗啦！可惜懷孕期嘅不適加忙碌嘅工作，呢個實驗當然不了了之啦！所以呢啲產品有無用我就不便評論啦。
結果我嘅胎教音樂就由我啲學生主導，佢哋玩咩音樂、啱音唔啱音、拍子準定唔準、好聽唔好聽，阿囡都要照單全收！到阿囡出世之後，初初都會俾啲大路啲嘅lullaby、peaceful d 嘅音樂佢聽，但好快發現佢對另一類音樂更有反應（下篇再講）。
不過無論係個人經驗定唔同嘅實驗都顯示，就算BB記得胎前嘅音樂，其實都只會維持一段好短嘅時間，因為出世後吸引佢嘅嘢將會更多！所以，胎教音樂聽咩就隨意啦，聽咗唔一定記得，記得亦唔一定會變音樂天才。如果你有成功嘅音樂胎教經驗，歡迎一齊分享吓呀！
