2021年1月6日
BB瞓覺音樂
BB出世初期都離不開「食、瞓、疴」，今次就講瞓啦！（其他兩項都唔係我專長，留返俾其他人講啦）
好多時新手父母對氹bb瞓覺都好頭痛.. 但唔少人都會嘗試播啲嘢俾BB聽，有啲BB聽自然環境聲瞓覺（風聲、水聲、雀仔聲）、有啲BB聽lullaby、有啲要聽真人唱歌.. 不過要知道咩音樂對佢有效，其實都要試嘅.. 之前有朋友仲好緊張咁問我佢個B要聽曾經紅極一時嘅小蘋果瞓覺.. 係咪有問題？
上文提過我初初都會俾個囡聽lullaby，聽咗兩個星期，又唔算好唔work，但我發覺佢聽Eason 嘅效果好啲.. （無錯，其實真係聽乜都得架..）.. 跟住就慢慢再tune 再試.. 知道佢對某首歌反應好，就keep住loop（個人覺得個playlist唔需要太長，因為BB未必適應到不停轉歌）。到我個囡兩三個月大嘅時候，我又發覺佢對某隻兒童英文CD嘅歌反應特別好，加上佢都幾明顯係鍾意聽有歌詞嘅音樂，所以啲純音樂好快就放埋咗一邊。
當你要幫小朋友建立瞓覺音樂嘅playlist時，我個人認為歌曲次序係好重要，最好每次都同一個playlist，同一個播放次序，等BB知道聽到呢個就係時候瞓覺啦.. 就正如for細個啲嘅music playgroup，每堂嘅程序都唔會有大分別，例如開始前唱hello song，落堂唱goodbye song一樣，內容亦唔會每次南轅北轍（遲啲有機會再詳談music playgroup嘅設計同理念）。
分享下我個囡嘅瞓覺playlist啦！佢其實係聽Muffin Songs嘅100 Children Hit Songs: Sing Along with B-family. 基本上佢聽到第六首前就會瞓冧.. 雖然啲歌係好普通嘅 The Wheels on the Bus, The Finger Family 等等.. 但佢係要聽呢隻碟嘅arrangement 先會瞓.. 所以當佢聽同一首歌嘅其他版本係唔會有眼瞓嘅表現㗎！呢個瞓覺playlist去到我個囡兩歲都仲work㗎！
