音樂 幼兒教育 隨筆
親子音樂班好嗎?

親子音樂班好嗎?

2021年3月7日

親子音樂班好嗎?

有人會問,「作為家長,最好緊係用行動支持小朋友學音樂啦,咁我同小朋友一齊上堂,一齊學咪得囉?」

家長願意以身作則,同小朋友一齊經歷,咁當然係好事啦!不過呢度嘅「一齊學」都可以有好多解讀嘅... 亦都有唔同層面... 例如家長同小朋友一齊學鋼琴,咁係咪可以一齊上堂呢?我個人嚟講就唔贊成,因為即使大家同樣都係未學過,但成年人嘅理解能力點都好過小朋友,初期進度亦會稍快,如果一齊上堂,老師又要確保小朋友跟得上,咁家長可能又會覺得好悶... 所以我會建議分開上堂,如果家長返屋企都勤力練習,對小朋友係一個好榜樣,小朋友見到家長進度較好,亦較容易有目標,甚至乎家長早一步已經練習緊小朋友過幾堂會學嘅歌,到小朋友真係學到首歌時,佢對首歌親切感都大啲啦! 假如大家都係初學,過幾個月後其實就可以加一堂「親子堂」啦!留意返,係「加」,唔係「轉」。咁呢堂親子堂可以做咩呢?當然係夾歌啦.. 有好多小朋友覺得學琴好悶係因為好孤獨,成日自己彈,自己夾,樂團又唔需要咁多鋼琴人.. 但如果有爸爸媽媽一齊陪,彈吓二重奏,咁呢個「陪」就變得值得!而同時,各自嘅鋼琴課都要繼續,咁大家先會一齊進步,技巧越彈越好,咁就可以彈到多啲編曲更好聽嘅二重奏音樂(通常好聽嘅嘢都有返咁上下難度嘅...) 咁如果小朋友學琴,家長本身又已經識,咁又點呢?當然家長可以直接選擇去親子班同小朋友夾下二重奏,又或者家長可以選擇一樣自己未學過嘅樂器重新學習,咁就同小朋友一齊由零開始... 家長勤力練習,小朋友自然會被感染到。 我曾經有個學生學緊小提琴,佢爸爸為左支持佢,同佢一齊學(雖然爸爸比阿囡遲咗兩年先起步),結果爸爸反而更加識得欣賞個囡,因為爸爸真係覺得學小提琴好難,仲要阿囡教返佢轉頭,由阿囡督促爸爸練琴,其實都係一個樂趣嚟嘅!

簡單嚟講,唔同程度有唔同嘅練習方法,但都離不開task-oriented,因為練習嘅本意就係想做好件事嘛!

翁瑋瑜小姐

本中心總監具備心理學學士及音樂系碩士資歷,並為香港教育局的註冊教師,對觀察兒童的行為及反應有豐富經驗。

總監透過觀察小朋友對不同樂器的反應,向家長提供選擇樂器的專業意見,對小朋友培養音樂興趣自然事半功倍!

總監翁瑋瑜