2021年3月14日
學樂器，每日要練幾耐？
以前好多老師會叫你每日要練習幾耐，咁先會有進步㗎.. 但其實我覺得練樂器同做功課一樣，你唔會叫小朋友用一個鐘頭做功課，如果嗰日功課多，一個鐘頭做唔哂，剩返嗰啲係咪唔駛做？家長當然話唔係啦，功課要做哂先叫完成，呢個係task-oriented。其實學樂器都一樣，你要佢練半個鐘樂器，如果佢係初學無咁多嘢練，為咗湊夠半個鐘嘅練習時間，死磨爛磨，不斷重複練同一樣野，好容易令到小朋友覺得練習係一件苦差，越練越無耐性，久而久之就唔想再學。
所以我教學生都係用task-oriented 嘅方法練習，而我會俾佢地揀。例如練scales，佢可以選擇同一條scale要連續三次完全正確嘅，如果連續兩次啱，第三次中途錯左，就要重新計過；或者佢可以揀總之每日十次完全正確，唔駛連續，但有錯音或好唔順暢個次唔可以計。我發覺好多學生都好受呢套，因為佢哋會衡量自己對嗰條scale嘅熟練程度去決定用邊個練習方案，務求令自己用最少嘅時間KO個task。咁樣練習，學生反而更有目標，而且會更用心，出嚟嘅成效更好！
有啲學生本性心急，又對首歌開始熟，就會有失控嘅現象（可能會越彈越快、啲拍子越嚟越唔足、running notes痴埋一齊）... 去到呢啲位，我就會叫佢哋錄住嚟練再自己聽返.. 因為去到佢失控嘅時候，佢已經唔記得自己彈咗咩，而錄音係最客觀、最誠實嘅證據。
簡單嚟講，唔同程度有唔同嘅練習方法，但都離不開task-oriented，因為練習嘅本意就係想做好件事嘛！
