2021年4月2日
音樂教學法：From Sound to Symbol
學音樂當然離唔開要學睇譜，不過如果小朋友好細個的話，又未必一定要由睇譜開始，喺音樂上叫「Sound before Symbol Approach」。
其實學彈琴（或者任何一種樂器）同小朋友初初開始學講嘢係好類似嘅。當小朋友一歲半開始牙牙學語時，教佢講嘢時，都係大人講，小朋友模仿，呢個係「Sound」。到小朋友再大啲，開始認字嘅時候，個字就係「Symbol」。From Sound to Symbol 就係先學聲音，再將個聲associate去個符號度。我諗無任何一個父母會期望小朋友開始識講嘢時就同時認到字？所以學音樂都係，小朋友唔係唔學睇譜，只係有先後次序。
大部分小朋友嘅學習模式都係模仿（越細嘅就越靠呢種方式學習），所以通常我教初學者（尤其係年紀較細嘅小朋友）都會有多啲示範，一來要令佢認識樂器聲音，二來就係訓練音感。到佢學到咁上下，就要佢自己搵音，自己研究下首歌係點樣，而呢個過程係需要一啲想像力。如果想小朋友演奏出嚟嘅音樂係有畫面，首先演奏者本身一路演奏時自己個腦都要有畫面，所以「想像力」嘅訓練係學音樂嘅過程係不可或缺嘅，所以如果小朋友一路學上去，學嘅唔單單係首歌嘅音點彈，更重要嘅人音樂嘅理解同表達，亦係點解大學音樂系點都讀音樂歷史，又或者你會聽過啲人講笑咁話「今晚要同貝多芬傾下計」、「陣間要莫札特上身」
所以，如果你小朋友好似淨係鍾意背譜，你都唔需要太擔心，因為當佢學音樂嘅年資越耐，佢慢慢就會associate到彈出嚟嘅音同譜上面嘅音，當然呢個過程都需要老師嘅教導同協助，正如學識認字同寫字都係需要時間一樣。
